રાજ્યમાં સ્થાનિક સ્વરાજ્યની સંસ્થાઓની ચૂંટણીઓ માટે આવતીકાલ રવિવારે વહેલી સવારથી મતદાન પ્રક્રિયા હાથ ધરવામાં આવશે. જેમાં તાલુકા પંચાયત, જિલ્લા પંચાયત તેમજ નગરપાલિકાઓની ચૂંટણી માટે રાજ્ય ચૂંટણી પંચ અને સ્થાનિક વહીવટી તંત્ર દ્વારા તમામ તૈયારીઓને આખરી ઓપ આપી દેવામાં આવ્યો છે. ત્યારે તમામ મતદારોને લોકશાહીના મહાપર્વમાં ભાગ લઇ પોતાના મતાધિકારનો અચૂક ઉપયોગ કરવા માટે અપીલ કરવામાં આવી છે….
સ્થાનિક સ્વરાજ્યની ચૂંટણીઓમાં મતદાન પ્રક્રિયા શાંતિપૂર્ણ, નિષ્પક્ષ અને પારદર્શક રીતે પૂર્ણ થાય તે માટે ચૂંટણી પંચે કમર કસી છે, જેમાં તમામ મતદાન મથકો પર પ્રિસાઇડિંગ ઓફિસર, પોલિંગ સ્ટાફ અને EVM (ઇલેક્ટ્રોનિક વોટિંગ મશીન) સુરક્ષિત રીતે પહોંચાડી દેવામાં આવ્યા છે. આ સાથે જ ગરમીની ઋતુને ધ્યાનમાં રાખીને મતદાન મથકો પર પીવાનું પાણી, મેડિકલ કિટ, છાંયડા માટે મંડપ અને દિવ્યાંગ તથા વૃદ્ધ મતદારો માટે વ્હીલચેર અને રેમ્પની ખાસ વ્યવસ્થા કરવામાં આવી છે..
મતદાન દરમિયાન કાયદો અને વ્યવસ્થા જળવાઈ રહે તે માટે રાજ્ય પોલીસ દ્વારા સઘન સુરક્ષા વ્યવસ્થા ગોઠવવામાં આવી છે. સંવેદનશીલ અને અતિ-સંવેદનશીલ મતદાન મથકો પર વિશેષ સુરક્ષા જવાનો તૈનાત કરવામાં આવ્યા છે. કોઈ પણ અપ્રિય ઘટનાને ટાળવા માટે પોલીસની પેટ્રોલિંગ ટીમો સતત ફરતી રહેશે. સ્થાનિક સ્વરાજ્યની ચૂંટણીઓ એ પાયાની લોકશાહી છે. આપણા ગામ, વોર્ડ કે શહેરના રસ્તા, પાણી, ગટર વ્યવસ્થા, સફાઈ અને આરોગ્ય જેવા સીધા અને રોજબરોજના પ્રશ્નો સ્થાનિક નેતૃત્વ દ્વારા જ ઉકેલવામાં આવે છે. તેથી એક યોગ્ય, શિક્ષિત અને જાગૃત ઉમેદવારની પસંદગી કરવી એ દરેક નાગરિકની પ્રાથમિક ફરજ બની જાય છે.
મતદારોને ખાસ અપીલ…
“મતદાન એ માત્ર આપણો અધિકાર નથી, પરંતુ એક પવિત્ર રાષ્ટ્રીય ફરજ છે. લોકશાહીના આ મહાપર્વમાં કોઈ પણ મતદાર પાછળ ન રહી જાય તે માટે દરેક નાગરિકે જાગૃત થવાની જરૂર છે. ચાલો, આપણે બધી જ કામગીરી થોડીવાર બાજુ પર રાખીને સૌથી પહેલાં મતદાન કરીએ અને આપણા ભવિષ્યને સુરક્ષિત કરીએ.”
તંત્ર દ્વારા તમામ નાગરિકોને અફવાઓથી દૂર રહી, નિર્ભયપણે અને કોઈપણ જાતના લોભ-લાલચ કે દબાણ વશ થયા વિના પોતાના વિવેકબુદ્ધિથી મતદાન કરવા જણાવાયું છે. આવતીકાલનું તમારું એક વોટ, તમારા વિસ્તારનું ભવિષ્ય નક્કી કરશે !
વાંકાનેર વિસ્તારમાં બનતી દરેક ઘટના અને દરેક સમાચારો સૌથી પહેલા મેળવવા માટે ચક્રવાત ન્યુઝ સાથે જોડાઓ….🗞️
👉🏻 નીચેની લિંક પર ક્લિક કરી અમારા WhatsApp ગ્રુપમાં જોડાઓ અને અન્ય લોકોને પણ આ લિંક Share કરી તેમને આપણી સાથે જોડો…..👇🏻👇🏻👇🏻
https://chat.whatsapp.com/L46DjAL3NUpBEc4klww6Ht?mode=gi_t
