૧.૮૩ હેક્ટરમાં ફેલાયેલા આ ગાર્ડનનું ૮૫ ટકા કામ પૂર્ણ, ટૂંક સમયમાં થશે લોકાર્પણ…
વાંકાનેર શહેરના નાગરિકોની સુખાકારી, મનોરંજન અને હરવા-ફરવા માટે વાંકાનેરમાં મોરબી જિલ્લાનો સૌથી મોટો અને ભવ્ય ‘નેહરુ ગાર્ડન’ તૈયાર થઈ રહ્યો છે. સરકાર અને સ્થાનિક વહીવટી તંત્રના સંકલનથી આકાર પામી રહેલો આ પ્રોજેક્ટ વાંકાનેરની વિકાસયાત્રામાં એક નવો માઈલસ્ટોન સાબિત થશે….
મળતી માહિતી મુજબ, વાંકાનેર શહેરમાં અંદાજે ૧.૮૩ હેક્ટર જેટલા વિશાળ વિસ્તારમાં આ અત્યાધુનિક ગાર્ડનનું નિર્માણ થઈ રહ્યું છે. નાગરિકોની સુખાકારીને ધ્યાનમાં રાખીને બનાવવામાં આવી રહેલા આ પ્રોજેક્ટની કામગીરી પૂરજોશમાં ચાલી રહી છે અને હાલમાં અંદાજે ૮૫ ટકા જેટલું કામ પૂર્ણ થઈ ચૂક્યું છે. આગામી ટૂંક સમયમાં જ આ નવલું નજરાણું વાંકાનેર શહેરની જનતા માટે લોકાર્પિત કરવામાં આવશે….
આ નવા ‘નેહરુ ગાર્ડન’ની વિશેષતા એ છે કે તેમાં નાના બાળકોથી લઈને વડીલો સુધીના તમામ વયજૂથના નાગરિકોનું ધ્યાન રાખવામાં આવ્યું છે. આ ગાર્ડનમાં હરિયાળીની સાથે સાથે બાળકો માટે આધુનિક પ્લે એરિયા, આકર્ષક અને મનમોહક મ્યુઝિકલ ફાઉન્ટેન, વડીલો અને શાંતિપ્રિય લોકો માટે યોગા ઝોન, ફિટનેસ પ્રેમીઓ અને યુવાનો માટે જોગિંગ ટ્રેક, નાસ્તા-પાણી માટે સુવિધાજનક કેન્ટીન સહીતની અત્યાધુનિક સુવિધાઓની વ્યવસ્થા કરવામાં આવનાર છે…
