વાંકાનેર – ચોટીલા નેશનલ હાઇવે પર અકસ્માતોની હારમાળા યથાવત જોવા મળી રહી છે, જેમાં લાલપર પેટ્રોલ પંપ પાસે ત્રણ દિવસ પૂર્વે સવારના સમયે નોકરી પર જઈ રહેલી એક મોપેડ સવાર યુવતીને પૂરપાટ ઝડપે આવતી કારના ચાલકે અડફેટે લેતા ગંભીર અકસ્માત સર્જાયો હતો. આ ઘટનામાં યુવતીને માથાના ભાગે હેમરેજ સહિતની ગંભીર ઈજાઓ પહોંચતા સઘન સારવાર અર્થે રાજકોટ સિવિલ હોસ્પિટલમાં ખસેડવામાં આવી છે….
બનાવની પ્રાપ્ત વિગતો અનુસાર, વાંકાનેરની ભાટિયા સોસાયટીમાં રહેતા પરીક્ષિતભાઈ દોલતરાય શુક્લની પુત્રી હિતાક્ષી ગત તા. ૧૨ના રોજ સવારે ૯:૦૦ વાગ્યાના અરસામાં પોતાનું પ્લેઝર મોપેડ (GJ-03-DE-9664) લઈને મેસરિયા ખાતે આવેલ કારખાનામાં કામે જવા નીકળી હોય દરમિયાન લાલપર ગામના પેટ્રોલ પંપ પાસેથી પસાર થતી વખતે પાછળથી પૂરપાટ અને ગફલતભરી રીતે આવતી કાર નંબર GJ-36-AL-6268 ના ચાલકે યુવતીના મોપેડને જોરદાર ટક્કર મારી હતી….
આ ગમખ્વાર અકસ્માતમાં મોપેડ પરથી ફંગોળાઈ ગયેલી હિતાક્ષીને માથાના ભાગે હેમરેજ અને ફ્રેક્ચર જેવી અત્યંત ગંભીર ઈજાઓ પહોંચી હતી. ઈજાગ્રસ્ત યુવતીને તાત્કાલિક સારવાર માટે પ્રથમ વાંકાનેરની હોસ્પિટલમાં અને ત્યારબાદ વધુ સારવારની જરૂરિયાત જણાતા રાજકોટની સિવિલ હોસ્પિટલમાં ખસેડવામાં આવી છે.
અકસ્માતના આ બનાવ સંદર્ભે ઈજાગ્રસ્ત યુવતીના પિતા પરીક્ષિતભાઈ શુક્લએ વાંકાનેર સીટી પોલીસ મથકમાં કાર ચાલક વિરુદ્ધ ફરિયાદ નોંધાવી છે. પોલીસે કાર ચાલક વિરુદ્ધ ગુનો નોંધીને આગળની કાયદેસરની કાર્યવાહી અને તપાસ હાથ ધરી છે…
