તાલુકા મુજબ ટીમોની રચના કરી આગામી સાત દિવસોમાં સર્વે કામગીરી પુર્ણ કરાશે, જે બાદ રિપોર્ટ રાજ્ય સરકારને સુપ્રત કરાશે….
મોરબી જીલ્લામાં છેલ્લા એક અઠવાડિયાથી પડેલા કમોસમી વરસાદને કારણે ખેતીમાં વ્યાપક નુકસાની થયેલ હોય, જેના કારણે ખેડૂતોની આખા વર્ષની મહેનત પર પાણી ફરી વળતા રાજ્ય સરકાર સમક્ષ ખેડૂતો માટે રાહત પેકેજ/સહયાની માંગ કરવામાં આવી રહી હોય, ત્યારે આ મામલે મોરબી જીલ્લામાં અલગ અલગ 29 ટીમોની રચના કરી નુકસાનીના સર્વેની કામગીરી સોંપવામાં આવી છે. જે ટિમોને આગામી સાત દિવસમાં સર્વેની કામગીરી પૂર્ણ કરી રિપોર્ટ તૈયાર કરવાનો રહેશે….
મોરબી જીલ્લામાં માવઠાએ ખેડૂતોના મોઢામાં આવેલો કોળિયો છીનવ્યો છે, ત્યારે નુક્સાનીનો સર્વે થાય તેવી પ્રબળ માંગ ઉઠી હતી. પરિણામે સરકારે સર્વેના આદેશ આપતા તમામ જીલ્લાઓમાં તંત્ર સર્વેના કામે લાગી ગયું છે. મોરબી જીલ્લામાં પણ 29 ટીમોની રચના કરવામાં આવી છે. જેમાં મોરબી તાલુકામાં 6, હળવદ તાલુકામાં 6, માળિયા તાલુકામાં 5, ટંકારા તાલુકામાં 5 , વાંકાનેર તાલુકામાં 7 ટિમો બનાવાય છે. આ તમામ ટિમો 346 ગામોમાં આગામી સાત દિવસમાં સર્વેની કામગીરી પૂર્ણ કરશે….
આ એક ટીમમાં બે ગ્રામ સેવક, તલાટી, સરપંચ, ઉપસરપંચ અને આગેવાનોનો સમાવેશ કરાયો છે. આ ટિમો દ્વારા ઓફલાઇન સર્વે કામગીરી હાથ ધરવામાં આવશે તેમજ સાથે ઓનલાઈન સર્વે પણ કરવામાં આવશે. વીસીઇ મારફત ફોટો અને અરજી સહિતની સામગ્રી અપલોડ કરીને ગાંધીનગરના કમાન્ડ એન્ડ કન્ટ્રોલ રૂમમાં મોકલવામાં આવશે. જ્યાં સેટેલાઇટ ઇમેજ સાથે સામગ્રીને સરખાવીને નુક્સાનીનો અંદાજ લગાવવામાં આવશે…
